Bicol Prose

Pag nababasa ko an mga gibo ni rio alma, richard gappi, namamatean ko an kulog sa puso, ta gare harayuon an sakuyang mga talinghaga. Gare makasarili an rason kan sakuyang pagtahi ki mga talinghaga.

Sana makaukod ako na matuon an sakuyang kusog sa pagpapadaba na nagpupuon sa pamilya paluwas sa kalsada paduman sa langiton. Dakul an nangingipuhan ki kusog, an artes buda sining dapat ituon sa paghahanap ki kauagmahan.

Ta dakul na man akong nasulat na rawit-dawit pero an an pungaw buda pagkamundo sarong hararom na balon, an tubig sa laog nito, tuyo na halos.

Sa mga tawo na makabasa kaini, sana man kita sinsero sa piggigibo ta, pwede na kita sinsero na magpakahusay maging manrarawit-dawit, pero an sining na an tuon eh kaugmahan sa mga oro-aldaw na mga pangyayari, pag-describe ki mga magagayon na bagay, dai man kita talaga natatabangan o dai man kita talaga nakakatabang.

Ta an tawo magurang, magkakaigwang hilang, an puso mabatak pag an karelayson minasiblang, sa huydyan an tawo magagadan. Habo ko na magtaram na an kagayunan permanente, dai ito an kagayunan nin sarong basong lemonada o pagkakan ki hamon sa pamanggihan kairiba an bilog na pamilya. An kaugmahan pemanente, pero kamo an makakahanap kaini at an kaugmahan obhetibo buda absolute ta kita gabos namamtean an kulog ki lawas na an satuyang mga organo naggugurang man.

Kaya gare makulog sa buot kun an nagluluwas sakuyang mga rawit-dawit, an mga diskursong pigtataram ko eh gare daing laog. Sarong joyride sana. Iyo, maugma pero dai yan an kaipuhan ta, pwede ngani kita makarot sa makakabasa ki satuyang mga obra, ta dai ta man maiwasan na daing laog na pilosipiya an ating mga pigtataram sa satuyang mga sining.

Iyo, dipisil na magtaram kun ano an tama buda basulon an mga sala, pero an mga tawo na mismo dapat an makaaram na sinda sala, pero sa panahon kan multimedia na halos kita gabos diyos na pwede na magtaram nin mga namamatean buda nabilog na mga pilosipiya, dipisil na maaraman kung sisay an nagtataram ki totoo.

An artista kapag aki pa, pwede na magtaram nin kagayunan nin salog o saiyang ilarawan an saiyang namamatean sa pig-iilusyong daraga pero maabot sana an panahon na mauukudan niya na an igwa pang mas mataas na panrasa o higher taste na kita pwede na mamatean na pag ito satuyang namatean ini natural na satuyang ibabahagi sa gabos.

Sa ngunyan muya ko na magbasa ki mga literatura buda mga sining kan artista na ang buhay piggamit sa pagpapanday ki katotohanan. Sana makaukod ako. Ini dipisil ta igwang mga problema arog kan inggit sa kapwa makata, su pagkamuya ta na maging pinakamurag, sarong ugari kan sarong aki.

Dakulon ki tawo na tatao magsurat, dai man ako nagtutubod sa wika, muya ko pa ring makaukod maging matibay sa tataramong bikolnon pero dai ito an pinakamahalaga, an pinakamahalga an pigtataram, mas mahalaga an pigtataram sa taramon.

Hamon ito sa gabos, sarong hamon satuyang mga sadiri mga kaapil.


Mabalos.