Minatawag nin kagadanan ang bilog na bulan

Minatawag nin kagadanan ang bilog na bulan.
Daramlagon nababatak an sakuyang mga tulang,
Akong tuninong na nakahigda digdi sa awot,
Sa awot na rekwerdos nin sarong pagkamoot,
Pagkamoot na an bulanon pandama mi
Sa malipot na bangui nin maugmahong solamente
Nin duwang nagkasararong kalag.

Ngunyan,
Tabak an paros na minaagi sakong halunan,
An awot piglulugadan an sakong mga bitis,
Pighihiling ko na sana sa harayo
An higdaan na nektar nin maugmahong kahapon.

Panahon, nuarin kaya kita mamimidbidan,
An daramlagon dai ko pa mapandukan,
Dai kaya yaon kamo para kami tukduan…

Mara na an sakong tasa nin kape,
Palsok na an ilaw sa kwarto ni mamay,
Digdi sa harong na dinuduman mi
Na kun sain kami alibangbang sa bangui.
Nadangog ko an mga bayong,
Pigaapod ninda ako na magpahingalo.
Tama na muna an muto-muto taram ko sa sadiri,
Pighiling ko an bilog na bulan,
an pandok pigtatakluban nin mga itom na dampog.