Bobombahin daa ninda an Albay,
Padagos an pagrorosaryo nin mga gurang sa simbahan,
ngunyan kaiba ninda an mga aki,
nangangadyi na an asul na langitnon dai maghali.
Mapaaram na ba ako sa mga barkada kong bayong
Na nagpaparumdom na an sikreto nin buhay
Magin kontento sa kun anong igwa ako.
Matayo pa ba ako ki harong pag sararo na an kinaban?
An Naga buda Albay magkakasararo
Pagsasaruin ki bomba,
Daing magiginibo an pigaapod ninda na pagkamoot,
Makasupog kun bomba an rason para madangog ta an lambang saro.
Baka dai na nin Pilipinas sa aga
An mga ataman kong ayam
Nagigiulok sinda kaiba nin mga bayong,
matakla an mga dampog sa tigbabayong hapon.
Bobombahin daa ninda an Albay,
Padagos sinda sa pagkawat nin Dota, nin basketball,
Bobombahin daa an Albay,
Kaya pigkarat niya an saiyang ilusyon
Kaya nagkaon siya ki masesebong karne.
Kaya pigbasa niya an paborito niyang rawitdawit sa kubeta.
Asul na langitnon mahali ka kaya?
Muya ko saimo mag-iba.
Subscribe to:
Post Comments (Atom)
No comments:
Post a Comment